समताज सहकार मिनी मॉल महिला बचत गट उत्पादित मालाचे विक्री केंद्र –सौ सुषमा देसले,लोकनियुक्त सरपंच दहीवद

समताज सहकार मिनी मॉल महिला बचत गट उत्पादित मालाचे विक्री केंद्र – सौ सुषमा देसले,लोकनियुक्त सरपंच दहीवद

कोपरगाव – ‘कोपरगाव तालुक्यातील महिला बचत गट आणि स्थानिक महिला उद्योजिका, व्यवसायिकांना बाजारपेठ उपलब्ध करून देण्यासाठी काका कोयटे यांच्या मार्गदर्शनाखाली समता नागरी सहकारी पतसंस्था आणि समता महिला बचत गट यांच्या माध्यमातून समताज सहकार मिनी मॉल हे महिलांनी तयार केलेल्या उत्पादित मालाचे विक्री केंद्र सुरु केले असून यामुळे स्थानिक बाजारपेठेला व्यापक स्वरूप प्राप्त होणार आहे तसेच बचत गटातील महिला या मिनी मॉल मुळे उत्पादन निर्मितीसाठी प्रोत्साहित होऊन मोठ्या प्रमाणात उत्पादन करून कोपरगाव बाजारपेठ पुनः एकदा आंतरराष्ट्रीय स्तरावर नावारूपाला येईल. यामुळे महिलांना या माध्यमातून आर्थिक स्थिरता प्राप्त होऊन त्यांच्या मुलभूत गरजा पूर्ण करता येणार आहे’. महिलांसाठीचा हा उपक्रम कौतुकास्पद असून महिलांमधील कलागुण विकसित करण्याबरोबरच महिलांना सक्षम व स्वावलंबी बनविणारा आहे’. असे प्रतिपादन दहीवद येथील लोकनियुक्त सरपंच, जळगाव जिल्हा सरपंच परिषदेच्या जिल्हाध्यक्षा सौ.सुषमा देसले यांनी केले.

महाराष्ट्र राज्य सहकारी पतसंस्था संचलित सहकार उद्यमी व समता महिला बचतगट यांच्या संयुक्तपणे समताज सहकार मिनी मॉल चे उद्घाटन समता नागरी सहकारी पतसंस्थेत सौ.सुषमा वासुदेव देसले यांच्या शुभ हस्ते १७ जानेवारी २०२२ रोजी करण्यात आले. प्रसंगी त्या बोलत होत्या. तसेच समता सहकार उद्योगिनी पुरस्कार कार्यक्रमाचे दीप प्रज्वलन दहीवद येथील लोकनियुक्त सरपंच व जळगाव जिल्हा सरपंच परिषदेच्या जिल्हाध्यक्षा सौ.सुषमा देसले यांचे हस्ते करून कोपरगाव तालुक्यातील महिला बचत गट व वेगवेगळ्या उद्योग, व्यवसाय क्षेत्रात उल्लेखनीय कार्य करीत असलेल्या महिलांना कार्यक्रमाच्या प्रमुख पाहुण्या सौ. सुषमा देसले, कोपरगाव नगर पालिकेच्या माजी नगराध्यक्षा सौ.ऐश्वर्यालक्ष्मी सातभाई, सौ.विद्या सोनवणे,सौ.उज्वला जाधव,समता पतसंस्थेच्या व्हा.चेअरमन सौ.श्वेता अजमेरे, संचालिका सौ.शोभा दरक यांच्या हस्ते व प्रमुख उपस्थितीत समता सहकार उद्योगिनी पुरस्कार देऊन गौरविण्यात आले.

‘समता सहकार उद्योगिनी’ पुरस्कार लता चौधरी, किरण डागा, किरण दगडे, राजश्री गुजराथी, रुपाली अमृतकर, सिमरन खुबाणी, शालिनी खुबाणी, भारती गोयल, रेखा भंडारी, योगिता कोठारी, निकिता रोडे, रश्मी कडू, राधिका शिरोडे, कीर्ती बागरेचा, स्मिता पोळ, मिताली लोंगाणी,श्रेया मालकर, नेहा ठोळे, श्वेता बंब, स्तुति ठोळे, श्रेया अजमेरे, सारिका काले, अपर्णा बज, स्वाती उराडे, जानव्ही आढाव, छाया अबक, अर्चना अजमेरा, विद्या सोनवणे, शिल्पा अजमेरा, असमत नबील, छाया ओस्तवाल, सिमरन मंटाला, मनीषा काले, नीलम लोहाडे आदि महिलांना देण्यात आला.

कार्यक्रमाचे प्रास्तविक समता महिला गटाचे अध्यक्ष सौ.सुहासिनी कोयटे यांनी केले. त्या म्हणाल्या कि,‘कोपरगावातील महिला उद्योजिकांना हा सामाजिक उपक्रम प्रोत्साहन देण्यासाठी सुरु करण्यात आला आहे. या सामाजिक उपक्रमात शहरातील सर्व माजी महिला नगराध्यक्षांनी आप-आपसातील राजकीय मतभेद विसरून या सामाजिक उपक्रमाच्या माध्यमातून समाजसेवेचे कार्य करण्यासाठी एकत्र येऊन समता परिवाराला सहकार्य करावे’ असे आवाहन केले. तसेच तालुक्यातील बचत गटातील महिलांनी उत्पादनांची गुणवत्ता वाढविण्यासाठी तसेच मार्गदर्शन करण्याची इच्छा व्यक्त केली.

प्रमुख उपस्थितांपैकी माजी नगराध्यक्ष सौ.ऐश्वर्यालक्ष्मी सातभाई, सौ.विद्या सोनवणे यांनी मनोगत व्यक्त करत समता सहकार मिनी मॉल चे माध्यमातून कोयटे परिवाराने कोपरगाव तालुक्यातील महिलांना हक्काची बाजारपेठ उपलब्ध करून दिली असून या सुवर्ण संधीचा कोपरगाव तालुक्याबरोबरच जिल्ह्यातीलही अनेक महिला बचत गटांनी लाभ घ्यावा. पुरस्कारप्राप्त उद्योजिका सौ.सारिका काले, कीर्ती बागरेचा, सौ.छाया अबक यांनीही मनोगत व्यक्त करत मनोगतातून कोयटे परिवाराने महिलांना प्राप्त करून दिलेली हि सुवर्ण संधी प्रत्येक महिलेने अंगीकारून मार्गदर्शक करणारे श्री.काका कोयटे आणि समता महिला बचत गटाच्या अध्यक्षा सौ.सुहासिनी कोयटे यांचे आभार मानले.

प्रसंगी प्रमुख पाहुण्या आणि प्रमुख उपस्थितांचा परिचय समता इंटरनॅशनल स्कूलच्या मॅनेजिंग ट्रस्टी सौ.स्वाती संदीप कोयटे यांनी करून दिला. तर प्रमुख पाहुण्या आणि प्रमुख उपस्थितांचा सत्कार कार्यक्रमाच्या अध्यक्षा व समता महिला बचत गटाच्या अध्यक्षा सौ.सुहासिनी कोयटे, समता पतसंस्थेच्या व्हा.चेअरमन सौ.श्वेता अजमेरे, संचालिका सौ.शोभा दरक यांच्या हस्ते करण्यात आला कार्यक्रम यशस्वितेसाठी समता महिला बचत गटाच्या महिलांनी विशेष परिश्रम घेतले. कार्यक्रमाचे सुत्रसंचलन आणि उपस्थितांचे आभार समता इंटरनॅशनल स्कूलच्या मॅनेजिंग ट्रस्टी सौ.स्वाती संदीप कोयटे यांनी मानले.