समताचे सहकार उद्योग मंदिर म्हणजे बचत गटातील महिलांचे माहेरघर – सौ दिपाली कुलकर्णी ; समता महिला बचत गट उत्पादित अगरबत्ती उत्पादनांचा शुभारंभ

समताचे सहकार उद्योग मंदिर म्हणजे बचत गटातील महिलांचे माहेरघर – सौ दिपाली कुलकर्णी ; समता महिला बचत गट उत्पादित अगरबत्ती उत्पादनांचा शुभारंभ

कोपरगाव : समता महिला बचत गटाच्या माध्यमातून उद्योग मंदिराची अनोखी संकल्पना राबवत अनेक महिलांना रोजगार उपलब्ध करून देत लोकल ते ग्लोबल ही संकल्पना सत्यात उतरवली आहे तसेच समता ब्रँडद्वारा महिला बचत गटांच्या उत्पादनांना ऑनलाईन बाजारपेठ उपलब्ध करून देत आर्थिक स्थिरता प्राप्त करून दिली आहे.समताने संपूर्ण महाराष्ट्रात नावलौकिक मिळविलेला असून याचे श्रेय काकांच्या खंबीर आणि प्रेमळ नेतृत्वाला जाते.असे मत कोपरगाव तालुक्यातील शारदा संगीत विद्यालयाच्या सौ दिपाली कुलकर्णी यांनी व्यक्त केले.

समताच्या सहकार उद्योग मंदिरात समता महिला बचत गटाने सहकार सुगंध,रातराणी,कस्तुरी, मिरॅकल या प्रकारे अगरबत्ती उत्पादित उत्पादनांचा शुभारंभ सौ दिपाली कुलकर्णी यांच्या हस्ते ७ डिसेंबर २०२१ रोजी शुभारंभ करण्यात आला. प्रसंगी त्या बोलत होत्या.

तसेच उपस्थितांना आवाहन करत म्हणाल्या की,इंडियन आयडॉल सोनी मराठी गोल्डन माईक विजेती टॉप १४ मधील गायनाच्या स्पर्धेत कु सुरभी केतन कुलकर्णी ही कोपरगाव तालुका आणि अहमदनगर जिल्ह्याचे नेतृत्व करीत असून तिला विजेती होण्यासाठी सहकार्य करावेत.

मार्गदर्शनपर मनोगत व्यक्त करताना समता महिला बचत गटाच्या अध्यक्षा सौ सुहासिनी कोयटे म्हणाल्या की,आपले सर्वांचे मार्गदर्शक काका कोयटे यांच्या मार्गदर्शनाखाली समताच्या माध्यमातून बचत गटातील महिलांना गेल्या अनेक दिवसापासून प्रत्येक महिलेच्या परिवारात स्थिरता प्राप्त व्हावी यासाठी रोजगार उपलब्ध करून दिला असून कोपरगाव तालुक्याबरोबरच आजूबाजूच्या तालुक्यातील बचत गटातील महिलांचा ही उत्स्फूर्त प्रतिसाद लाभत असल्यामुळे अधिकाधिक रोजगार मिळावा या उद्देशाने आज विविध प्रकारच्या अगरबत्ती उत्पादनांचा शुभारंभ करण्यात येत आहे याचा सर्वच महिलांनी लाभ घ्यावा.

कार्यक्रमाच्या प्रमुख पाहुण्या सौ दिपाली कुलकर्णी आणि श्री केतन कुलकर्णी यांचे स्वागत आणि सत्कार समता महिला बचत गटाच्या अध्यक्षा सौ सुहासिनी कोयटे यांच्या हस्ते समता महिला बचत गटाच्या महिलांनी कलाकुसरीने अगरबत्ती आणि कापूर एकत्र बांधून तयार करण्यात आलेला गुच्छ देऊन सत्कार करण्यात आला. अध्यक्षस्थान समता परिवाराचे आधारस्तंभ ओमप्रकाश दादाप्पा तथा काका कोयटे यांनी भूषविले तर शारदा संगीत विद्यालयाचे शिक्षक श्री केतन कुलकर्णी,समता महिला बचत गटाच्या अध्यक्षा सौ सुहासिनी कोयटे,समता महिला बचत गटाच्या महिला तसेच कोपरगाव तालुक्यातील महिला बचत गटाच्या महिला मोठ्या प्रमाणात उपस्थित होत्या.

प्रसंगी अगरबत्ती व कापूर उत्पादन विभागाचे कर्मचारी श्री अजय तांबे यांनी मनोगत व्यक्त करून अगरबत्ती उत्पादन प्रकाराविषयी माहिती दिली. सुत्रसंचालन अगरबत्ती व कापूर उत्पादन विभागाच्या कु रेणुका मुन्शी यांनी केले.कार्यक्रम यशस्वीतेसाठी अगरबत्ती व कापूर उत्पादन विभागाचे कर्मचारी श्री विश्वास सावरगावकर आणि समता महिला बचत गटाच्या महिलांनी विशेष परिश्रम घेतले.उपस्थितांचे आभार कर्मचारी श्री प्रदीप वैद्य यांनी मानले