समता योग भवनमध्ये दीपोत्सवाचा प्रकाशोत्सव; सप्तचक्रांच्या मांडणीतून योग आणि आरोग्याचा संदेश!

समता योग भवनमध्ये दीपोत्सवाचा प्रकाशोत्सव; सप्तचक्रांच्या मांडणीतून योग आणि आरोग्याचा संदेश!

कोपरगाव : दीपावलीच्या मंगलमय पहाटे प्रकाशाचा उत्सव आणि योगसाधनेचा आरोग्यदायी संदेश यांचा अनोखा संगम समता योग भवन येथे अनुभवायला मिळाला. समता योग मंदिराचे मार्गदर्शक ओमप्रकाश दादाप्पा तथा काका कोयटे, योग प्रशिक्षक अभिजीत शहा व सतीश गुजराथी यांच्या अभिनव संकल्पनेतून आयोजित करण्यात आलेला दीपोत्सव उत्साहपूर्ण आणि मांगल्यपूर्ण वातावरणात साजरा झाला. यावेळी मानवी शरीरातील सप्तचक्रांचे महत्त्व दिव्यांच्या आकर्षक मांडणीतून अधोरेखित करण्यात आले.

‘तमसो मा ज्योतिर्गमय’ या उक्तीप्रमाणे अंधाराकडून प्रकाशाकडे जाण्याचा संदेश दीपोत्सवातून देण्यात आला. ज्याप्रमाणे दीपज्योती अंधार दूर करून प्रकाश निर्माण करते, त्याचप्रमाणे नियमित योगाभ्यासामुळे शरीरातील आळस व नकारात्मकता दूर होऊन निरोगी आणि सकारात्मक जीवन जगण्याची प्रेरणा मिळते, हा विचार या उपक्रमातून मांडण्यात आला.

या दीपोत्सवाचे विशेष आकर्षण म्हणजे मानवी शरीरातील सप्तचक्रांचे महत्त्व दिव्यांच्या माध्यमातून साकारण्यात आलेली देखणी मांडणी. या अनोख्या संकल्पनेमुळे उपस्थितांना योगशास्त्रातील चक्रांचे महत्त्व जाणून घेण्याची संधी मिळाली.

यावेळी प्रसिद्ध योगगुरू अभिजित शहा यांनी उपस्थितांना योगाचे शारीरिक व मानसिक आरोग्यातील महत्त्व विशद करून नियमित योगसाधनेचे फायदे सांगितले. तसेच उदयोन्मुख तरुण योगपटू प्रज्वल ढाकणे याने अवघड आणि क्लिष्ट योगासनांची प्रात्यक्षिके सादर करून उपस्थितांची दाद मिळवली.

या सोहळ्यास शैलेंद्र कुलकर्णी, राजाभाऊ जगताप, कमलाकर भालेराव, मेहेत्रे नाना, घेमुड साहेब, नंदकिशोर जाधव, राम जावरे सर, अनिल इंगळे, रवींद्र गाडेकर, संतोष जाधव यांच्यासह इतर योगसाधक उपस्थित होते. तसेच महिला योगशिक्षिका नाजुकाताई गव्हाळे, क्षमा कुलकर्णी, मंदाताई घनघाव, सौ. पाटोळे, सौ. जाधव, सौ. शहा, सौ. कहांडळ, वैद्य, कुमारी संस्कृती शहा, कुमारी समृद्धी गुजराथी यांच्यासह महिला योगसाधकांनीही मोठ्या संख्येने सहभाग नोंदविला.

दीपावलीच्या पहाटे योगसाधना, दीपप्रज्वलन आणि आरोग्यविषयक विचारांची सांगड घालत नियमित योगासने करण्याचा व आरोग्यसंपन्न जीवन जगण्याचा संकल्प करून या दीपोत्सवाची उत्साहात सांगता झाली.