सहकार विभागाच्या अधिकाऱ्यांची समता पतसंस्थेच्या मुख्य कार्यालयास सदिच्छा भेट

सहकार विभागाच्या अधिकाऱ्यांची समता पतसंस्थेच्या मुख्य कार्यालयास सदिच्छा भेट

कोपरगाव : बदलत्या काळानुरूप पतसंस्था चळवळीला ग्राहक, सभासदांच्या उत्कृष्ट सेवेबरोबरच आधुनिक तंत्रज्ञानाचा उपयोग करणे ही काळाची गरज बनली आहे.समता पतसंस्थेने ही गरज ओळखून समतात आधुनिक तंत्रज्ञानाचा वापर मोठ्या प्रमाणात होत असून फॉरेन्सिक ऑडिट कंट्रोल रूम,ऑनलाईन समता वसुली पॅटर्न,व्हाऊचरलेस बँकिंग सुविधा आणि क्यू.आर.कोड सुविधा या कौतुकास्पद आहे.असे गौरोद्गार महाराष्ट्र राज्य पुणे विभागाचे सहनिबंधक श्री तान्हाजी कवडे यांनी काढले.

समता नागरी सहकारी पतसंस्थेच्या मुख्य कार्यालयास ३ जून २०२२ रोजी महाराष्ट्र राज्य पुणे विभागाचे सहनिबंधक श्री तान्हाजी कवडे,मुंबई विभागाचे विभागीय सहनिबंधक श्री राम शिर्के,नाशिक विभागाचे विभागीय सहनिबंधक श्री आर.सी.शाह, नाशिकचे विशेष लेखा परीक्षक श्री एस.व्ही.महंत,लेखा परीक्षक श्री माळेकर,श्री आर.सी.पवार,संगमनेरचे लेखा परीक्षक श्री बोडके,कोपरगावचे लेखा परीक्षक श्री दिपक सावंत, श्री कोकाटे,श्री गांगुर्डे आदींनी सदिच्छा भेट दिली.प्रसंगी संस्थेचे जेष्ठ संचालक श्री जितुभाई शहा,जनरल मॅनेजर सचिन भट्टड, सी.ए.श्री सुरेंद्र येवले, मुख्य कार्यालयातील अधिकारी उपस्थित होते.उपस्थित अधिकाऱ्यांचा सत्कार संस्थेचे चेअरमन काका कोयटे,जनरल मॅनेजर श्री सचिन भट्टड यांच्या हस्ते करण्यात आला.

प्रसंगी समता पतसंस्थेचे चेअरमन काका कोयटे म्हणाले की,समता पतसंस्थेला महाराष्ट्रातील अनेक पतसंस्था भेट देऊन समतातील आधुनिक तंत्रज्ञान,कार्यालयातील कामकाजाचे व्यवस्थापन, ग्राहक,सभासदांना दिली जाणारी सेवा,समताच्या सभासद हिताच्या विविध योजना व उपक्रमांचा अभ्यास करून त्या योजना,उपक्रम,आधुनिक तंत्रज्ञान त्यांच्या पतसंस्थेत राबवत असतात पण आज समता पतसंस्थेला महाराष्ट्रातील सहकार विभागातील विविध विभागाच्या अधिकाऱ्यांनी सदिच्छा भेट देणे ही समता परिवारासाठी अभिमानाची बाब आहे.

मुंबई विभागाचे विभागीय सहनिबंधक श्री राम शिर्के म्हणाले की, सहकार काय आहे? हे काकांच्या कार्यातून संपूर्ण महाराष्ट्राला परिचित आहे.त्यांनी महाराष्ट्रातील विविध पतसंस्थांचे अनेक प्रश्न स्वतःची पतसंस्था समजून मोठ्या प्रमाणात सोडविले असून पतसंस्था चळवळीच्या विविध मागण्या पूर्ण करण्यासाठी महाराष्ट्रातील सहकार नेत्यांनी केंद्रातील सहकार विभागात जाऊन सोडवू असा शब्द काकांना दिलेला आहे.ही महाराष्ट्रातील पतसंस्था चळवळीसाठी अभिमानाची बाब आहे तर नाशिक विभागीय सहनिबंधक श्री आर.सी. शाहा म्हणाले की, काका आणि जितूभाई यांनी माझ्यासोबत केलेल्या विचार विनिमयातून ११ मे १९८६ रोजी समता पतसंस्थेची स्थापना केली आणि ३६ वर्षा नंतर आज काकांच्या माध्यमातून समता पतसंस्था भक्कम स्थितीत असून महाराष्ट्रातील पतसंस्थांचे नेतृत्व करीत आहे.

प्रसंगी समता नागरी सहकारी पतसंस्थेचे चेअरमन ओमप्रकाश दादाप्पा तथा काका कोयटे यांच्याशी समता पतसंस्थेचे आधुनिक तंत्रज्ञान, विविध योजना व उपक्रम, फॉरेन्सिक ऑडीट कंट्रोल रूम, व्हाऊचर लेस बँकिंग सुविधा,क्यु.आर.कोड,समता रिकव्हरी पॅटर्न,सोने तारण विभाग आदिं विषयी चर्चा करून संस्थेचे चेअरमन काका कोयटे, पदाधिकारी, अधिकारी, कर्मचारी यांनी सविस्तर माहिती दिली.उपस्थित अधिकारी यांना समता पतसंस्थेविषयी मिळालेल्या माहिती बद्दल समाधान व्यक्त करत समताचे अधिकारी,कर्मचारी यांनी दिलेली अनमोल माहिती व बहुमोल वेळ दिल्याबद्दल विभागीय सहनिबंधक श्री राम शिर्के यांनी आभार मानले आणि समताच्या पुढील आर्थिक वाटचालीस शुभेच्छा देत निरोप घेतला.