लहान वयात मुलांनी अनुभवली समता पतसंस्था
कोपरगाव : समता नागरी सहकारी पतसंस्थेतील अत्याधुनिक तंत्रज्ञान, सभासद हित जोपासणाऱ्या विविध योजना व उपक्रम, कामकाजाची पद्धत, सामाजिक उपक्रमांची माहिती घेण्यासाठी व समतातील काही योजना व उपक्रमांचा अवलंब स्वतःच्या पतसंस्थेत करावयाचा असल्याने महाराष्ट्रातील वेगवेगळ्या पतसंस्थांचे चेअरमन, संचालक सदिच्छा भेट देत असतात. सध्या शाळांना उन्हाळी सुट्टी लागल्यामुळे शिक्षणाव्यतिरिक्त लहान वयात सहकारातील पतसंस्था चळवळ , पतसंस्थामधील कामकाजाची माहिती व्हावी या हेतूने २ मे २०२३ रोजी आशियाई पतसंस्थांचे प्रतिनिधित्व करणाऱ्या एशियन कॉन्फडरेशन ऑफ क्रेडिट युनियन (ॲक्यू) या आंतरराष्ट्रीय शिखर संघटनेचे सदस्यत्व मिळालेली भारतातील एकमेव समता नागरी सहकारी पतसंस्थेला चार चिमुकल्यांनी सदिच्छा भेट दिली.
यात औरंगाबाद येथील राघव प्रमोद लोणगावकर, जालना येथील स्वयम प्रीतम लोणगावकर, शौर्य प्रीतम लोणगावकर आणि कोपरगाव येथील ईशान संदीप कोयटे या लहान मुलांचा समावेश होता.
या वेळी समता पतसंस्थेची आधुनिक तंत्रज्ञानाच्या माध्यमातून मोबाईल बँकिंग, व्हाऊचरलेस बँकिंग सुविधा, क्यु.आर.कोड, फॉरेन्सिक ऑडीट कंट्रोल रूम, समता रिकव्हरी पॅटर्न, सोनेतारण विभाग या पतसंस्था चळवळीला दिशादर्शक असणारी अत्याधुनिक बँकिंग प्रणाली विषयी संस्थेचे फंड विभागाचे श्री.निलेश देशमाने, बोर्ड सेक्रेटरी श्री.संतोष मुदबखे, ईडीपी विभागाचे श्री.बाबासाहेब ठोंबरे, श्री.नदीम अत्तार आणि समता सहकार मिनी मॉल आणि अगरबत्ती कापूर उत्पादन विभागाची माहिती समता महिला बचत गटातील महिलांनी सविस्तर दिली.
ज्या विभागाची माहिती समजण्यास अवघड वाटत होती, ती माहिती त्या विषयी अधिक प्रश्न विचारून पुन्हा – पुन्हा घेत होते. काही विभागात तर त्यांनी प्रत्यक्षात प्रात्यक्षिकेही केली. लहान वयात शिक्षण आणि मैदानावरील खेळांसोबतच सहकार क्षेत्रातील पतसंस्थांच्या माध्यमातून जी समाजसेवा केली जाते, ती पाहून त्यांच्या चेहऱ्यावर आनंद दिसून येत होता.
