महाराष्ट्र राज्यातील सहकारी पतसंस्थांच्या बळकटीकरणासाठी महाराष्ट्र राज्य सहकारी पतसंस्था फेडरशनच्या सहकार्याने सहकार विभाग सकारात्मक निर्णय घेईल – श्री अनिल कवडे, सहकार आयुक्त

महाराष्ट्र राज्यातील सहकारी पतसंस्थांच्या बळकटीकरणासाठी महाराष्ट्र राज्य सहकारी पतसंस्था फेडरेशनच्या सहकार्याने सहकार विभाग सकारात्मक निर्णय घेईल – श्री अनिल कवडे,सहकार आयुक्त

कोपरगाव : महाराष्ट्र राज्यातील सहकारी पतसंस्थांच्या बळकटीकरणासाठी महाराष्ट्र शासन सहकार विभागाच्यावतीने जिल्हा स्तरावर तसेच तालुका स्तरावर कार्यशाळा घेऊन पतसंस्था चळवळ बळकट करण्याचा प्रयत्न करीत आहे.या बळकटीकरणाच्या मोहिमेमध्ये महाराष्ट्र राज्य सहकारी पतसंस्था फेडरेशनशी विचार – विनिमय करून सकारात्मक निर्णय घेण्यात येतील.असे प्रतिपादन महाराष्ट्र राज्य सहकार खात्याचे सहकार आयुक्त श्री अनिल कवडे यांनी केले.

अहमदनगर जिल्हा उपनिबंधक कार्यालय, महाराष्ट्र राज्य सहकारी पतसंस्था फेडरेशन व अहमदनगर जिल्हा सहकारी पतसंस्था स्थैर्यनिधी संघ यांच्या वतीने शिर्डी येथे महाराष्ट्र सहकारी अधिनियम १९६० चे कलम १४४ व नियामक मंडळ या विषयावर आयोजित कार्यशाळे प्रसंगी ते बोलत होते.

याप्रसंगी महाराष्ट्र राज्य सहकारी पतसंस्था फेडरेशनचे अध्यक्ष
ओमप्रकाश दादाप्पा तथा काका कोयटे यांनी सहकारी पतसंस्थांच्या वतीने मांडलेल्या विविध विषयांवर बोलताना सहकार आयुक्त श्री अनिल कवडे म्हणाले की, महाराष्ट्रातील सहकारी पतसंस्थांना नाममात्र सभासदांच्या ठेवी स्वीकारण्यासाठी नाममात्र सभासदांचा वेगळा मतदार संघ तयार करून मार्ग काढण्याचा प्रयत्न करण्यात येईल तसेच बँकांना ज्याप्रमाणे ॲसेट रिकन्स्ट्रक्शन कंपनीला आपली थकीत कर्जे विकता येतात, त्याच धर्तीवर महाराष्ट्र राज्य सहकारी पतसंस्था फेडरेशनने ॲसेट रिकन्स्ट्रक्शन को-ऑपरेटिव्ह क्रेडिट सोसायटी स्थापन करण्यासाठी प्रस्ताव तयार करून सहकार खात्याकडे सादर करावा. त्याबाबत सकारात्मक विचार करण्यात येईल. तसेच बँकांना लागू असलेल्या सिबिल रिपोर्टमध्ये महाराष्ट्रातील सहकारी पतसंस्थांचा समावेश होण्यासाठी उच्च स्तरावर सहकार खात्याची बोलणी चालू आहेत, ही बोलणी प्रगती पथावर आहेत. सिबील मध्ये पतसंस्थांचा समावेश झाल्यास पतसंस्थांचा एनपीए कमी होण्यास मदत होईल.

प्रसंगी महाराष्ट्र राज्य सहकारी पतसंस्था फेडरेशनचे अध्यक्ष ओमप्रकाश दादाप्पा तथा काका कोयटे म्हणाले की,पतसंस्था चळवळ जिल्हा,तालुक्याबरोबरच ग्रामीण भागात ही पोहचली आहे. चळवळीतील पतसंस्थांना सहकार व्यवस्थेचे नियम व कायद्यांमध्ये होणाऱ्या बदलांची माहिती महाराष्ट्र राज्य सहकारी पतसंस्था फेडरेशन विभागीय कार्यशाळा घेऊन सविस्तर देत असते यातून पतसंस्था चळवळ बळकट होण्यास अधिक मदत होते त्यामुळे महाराष्ट्रातील पतसंस्थांसाठी कार्यशाळांचे आयोजन करीत असतो.

कार्यशाळेचे उद्घाटन अहमदनगर जिल्ह्याचे उपनिबंधक श्री गणेश पुरी यांच्या हस्ते व नाशिक विभागाच्या विभागीय सहनिबंधक डॉ ज्योती लाटकर,अहमनगर जिल्ह्यातील प्रत्येक तालुक्याचे सहाय्यक निबंधक, अहमदनगर जिल्हा सहकारी पतसंस्था स्थैर्यनिधीचे अध्यक्ष श्री सुरेश वाबळे,उपाध्यक्ष श्री वसंत लोढा, महाराष्ट्र राज्य सहकारी पतसंस्था फेडरेशनचे महासचिव डॉ शांतीलाल शिंगी, उपकार्याध्यक्ष श्री सुदर्शन भालेराव,संचालक श्री लक्ष्मण पाटील,श्री सुरेश पाटील,श्री चंद्रकांत वंजारी,श्री गोविंद अगरवाल, संचालिका सौ अंजली पाटील,सौ भारती मुथा आदी पदाधिकाऱ्यांच्या उपस्थितीत करण्यात आले.

कार्यशाळेचे उद्घाटक श्री गणेश पुरी आणि प्रमुख मार्गदर्शक श्री अनिल कवडे यांचा सत्कार महाराष्ट्र राज्य सहकारी पतसंस्था फेडरेशनचे अध्यक्ष काका कोयटे यांच्या हस्ते करण्यात आला.
या कार्यशाळेला अहमदनगर जिल्ह्यातील पतसंस्थांच्या प्रतिनिधींचा उत्स्फूर्त प्रतिसाद लाभला.कार्यक्रमाचे सुत्रसंचालन आणि उपस्थितांचे आभार महाराष्ट्र राज्य सहकारी पतसंस्था फेडरेशनच्या मुख्य कार्यकारी अधिकारी सौ सुरेखा लवांडे यांनी मानले.