माझ्या यशात समता परिवाराचे महत्वपूर्ण योगदान – अक्षय आव्हाड
कार्यकारी संपादक प्रा.पोपट साळवे
माझ्या यशात समता परिवाराचे महत्त्वपूर्ण योगदान – अक्षय आव्हाड
कोपरगाव : माझा क्रीडा क्षेत्रातील प्रवास अपयशातून यशाकडे जाणारा आहे. अपयश,अनुभवातून शिकत गेलो अन् यश मिळत गेले. बेसबॉल या क्रीडा प्रकाराच्या माध्यमातून राज्याचे व देशाचे नाव क्रीडा क्षेत्रात उंचविण्याची संधी मिळाली. या यशामागे माझे कुटुंब, क्रीडा शिक्षक, मार्गदर्शक यांचा सिंहाचा वाटा असून समता परिवाराचे महत्त्वपूर्ण योगदान असल्याचे राज्यस्तरीय शिवछत्रपती क्रीडा पुरस्कार प्राप्त अक्षय आव्हाड यांनी सांगितले. समता परिवाराचे सदस्य व तालुक्यातील जेऊर कुंभारी येथील अक्षय मधुकर आव्हाड यांना महाराष्ट्र शासनाचा क्रीडा क्षेत्रातील प्रतिष्ठेचा राज्यस्तरीय शिवछत्रपती क्रीडा पुरस्कार मिळाल्याबद्दल बॅडमिंटनपटू व वैद्यकीय क्षेत्रातील अस्थि रोग तज्ज्ञ डॉ.प्रीतम जपे आणि समता परिवाराचे संस्थापक ओमप्रकाश दादाप्पा तथा काका कोयटे यांचा हस्ते समता परिवार आयोजित सत्कार समारंभात यथोचित सन्मान करण्यात आला.
या वेळी कार्यक्रमाचे प्रमुख पाहुणे व प्रसिद्ध बॅडमिंटनपटू डॉ.प्रितम जपे म्हणाले की, बेसबॉल या क्रीडा प्रकारात अक्षय आव्हाड यांना शिवछत्रपती पुरस्कार मिळाल्यामुळे कोपरगाव शहराच्या शिरपेचात मानाचा तुरा रोवला गेला असून महाराष्ट्र शासनाने या खेळाच्या लोकप्रियतेची जबाबदारी त्यांच्याकडे दिली आहे. कोपरगाव तालुक्यात कबड्डी, खो-खो खेळांपासून सुरुवात झाली होती. आज तालुक्यात फुटबॉल, बॅडमिंटन, टेनिस बास्केटबॉल, हॉलीबॉल, क्रिकेट यांसारख्या विविध खेळात प्राविण्य मिळविलेले ५ हजारांपेक्षा पेक्षा अधिक नॅशनल खेळाडू आहेत.महाराष्ट्र शासनाचा क्रीडा विभाग आणि तालुक्यातील विविध संस्था, संघटनांनी विविध खेळ आणि खेळाडूंना ऊर्जितावस्था प्राप्त करून देत नवसंजीवनी देण्याचा प्रयत्न करावा. कार्यक्रमाचे प्रास्तविक अहमदनगर जिल्हा जम्प रोप असोसिएशन अध्यक्ष व सुधन गोल्ड लोनचे चेअरमन संदीप कोयटे यांनी केले. तसेच हॉलीबॉल व तलवारबाजी खेळाचे राज्यस्तरीय पंच शिवप्रसाद घोडके लिखित ‘क्रीडा विश्व कोपरगावचे… या लेखाचे प्रकाशन प्रमुख पाहुणे व मान्यवरांच्या हस्ते करण्यात आले. तत्पूर्वी अक्षय आव्हाड यांची डॉ. बाबासाहेब आंबेडकर यांच्या पुतळ्याला पुष्पहार अर्पण करुन लेझीमच्या तालात व डिजेच्या सुरात जंगी मिरवणूक काढण्यात आली.
कर्तृत्व, नेतृत्व, मातृत्व व दातृत्व ज्यांच्याकडे असते. तेच सत्कार समारंभाच्या कार्यक्रमातून त्या त्या क्षेत्रातील व्यक्तींना प्रोत्साहन देऊन भविष्यात साथ देत असतात.त्यातीलच एक समता परिवार आहे. समता परिवाराचे संस्थापक काका कोयटे यांच्याकडे कर्तृत्व, नेतृत्व, मातृत्व व दातृत्व आहे. कोपरगाव तालुका खेळाडूंची खाण आहे. त्या खाणीतील कोळशांना चमकविण्याचे काम समता परिवार करत असल्याचे अहमदनगर बेसबॉल असोसिएशनचे अध्यक्ष अरुण चंद्रे यांनी सांगितले. तसेच समता परिवाराचे संस्थापक काका कोयटे, जेष्ठ खेळाडू दिलीप दारूणकर, सुनिल गंगुले यांनी मनोगत व्यक्त करून कोणताही खेळाडू एका दिवसात घडत नाही त्यासाठी प्रयत्न खूप महत्त्वाचे असल्याचे सांगत अक्षय आव्हाड यांच्या पुढील कारकिर्दीस शुभेच्छा देत तालुक्यातील विविध खेळांची तत्कालीन स्थिती व्यक्त करत जुन्या आठवणींना उजाळा दिला. या वेळी जेष्ठ खेळाडू दिलीप दारुणकर, सुनिल गंगुले, अहमदनगर बेसबॉल असोसिएशनचे अध्यक्ष अरुण चंद्रे, महाराष्ट्र बेसबॉल असोसिएशनचे सहसचिव मकरंद कोऱ्हाळकर, कोपरगाव तालुका क्रीडा समिती अध्यक्ष नितीन निकम, विद्यापीठ बेसबॉल व सॉफ्टबॉल प्रशिक्षक सुनिल कुटे, जेष्ठ क्रीडा प्रशिक्षक दत्ता देवकर, धनंजय देवकर, माजी पुणे विद्यापीठ संघ कर्णधार सुभाष पाटणकर,बाळासाहेब वक्ते, राजाभाऊ गिरमे, राजेंद्र कोपरे, समता इंटरनॅशनल स्कूलच्या प्राचार्या हर्षलता शर्मा, मधुकर आव्हाड आदींसह श्रीरामपूर, राहाता, येवला तालुक्यातील आजी-माजी खेळाडू, समता पतसंस्थेचे पदाधिकारी, अधिकारी आणि समता इंटरनॅशनल स्कूलचे विद्यार्थी, शिक्षक – शिक्षकेत्तर कर्मचारी मोठ्या प्रमाणात उपस्थित होते. कार्यक्रमाचे सुत्रसंचालन व उपस्थितांचे आभार समता इंटरनॅशनल स्कूलचे उपप्राचार्य समीर अत्तार यांनी मानले.
