कोपरगाव शहर पोलीस स्टेशनचे नवनियुक्त पोलीस निरीक्षक रामकृष्ण कुंभार यांची समता पतसंस्थेला सदिच्छा भेट ; “तालुक्यातील व्यापार सुरक्षेसाठी नवा विश्वास – पोलीस निरीक्षक कुंभार यांची व्यापाऱ्यांशी संवाद बैठक”

कोपरगाव शहर पोलीस स्टेशनचे नवनियुक्त पोलीस निरीक्षक रामकृष्ण कुंभार यांची समता पतसंस्थेला सदिच्छा भेट 

तालुक्यातील व्यापार सुरक्षेसाठी नवा विश्वास – पोलीस निरीक्षक कुंभार यांची व्यापाऱ्यांशी संवाद बैठक

कोपरगाव (प्रतिनिधी) – कोपरगाव शहर पोलीस स्टेशनचे नव्याने नियुक्त झालेले पोलीस निरीक्षक (पीआय) रामकृष्ण कुंभार यांनी समता नागरी सह. पतसंस्था मर्या. कोपरगावच्या मुख्य कार्यालयाला सदिच्छा भेट दिली. या भेटीदरम्यान संस्थेच्या वतीने त्यांचे मनःपूर्वक स्वागत करण्यात आले आणि त्यांना पुढील यशस्वी कार्यकाळासाठी शुभेच्छा देण्यात आल्या.

या कार्यक्रमास समता पतसंस्थेचे चेअरमन ओमप्रकाश दादाप्पा तथा काका कोयटे, जनरल मॅनेजर सचिन भट्टड, शहर पोलीस स्टेशनचे गणेश काकडे, कोपरगाव तालुका किराणा मर्चंट असोसिएशन अध्यक्ष राजकुमार बंब, कोपरगाव तालुका व्यापारी महासंघाचे संचालक गुलशन होडे, महावीर सोनी, मानव शुक्ला, सचिव प्रदीप साखरे आदींसह शहरातील व्यापारी, कोपरगाव शाखाधिकारी योगेश मोरे, मुख्य कार्यालयाचे विविध विभागांचे अधिकारी व कर्मचारी मोठ्या संख्येने उपस्थित होते.

भेटीदरम्यान पीआय कुंभार यांनी संस्थेच्या कार्यपद्धतीची, सामाजिक उत्तरदायित्वाची आणि जनहितासाठी राबविण्यात येणाऱ्या विविध उपक्रमांची माहिती घेतली. त्यांनी संस्थेच्या सामाजिक बांधिलकीचे कौतुक केले व भविष्यात पोलीस प्रशासन आणि पतसंस्थेमध्ये अधिक चांगला समन्वय राखून काम करण्याचा विश्वास व्यक्त केला. तसेच कोपरगाव तालुका व्यापारी महासंघाच्या माध्यमातून केली जाणारी व्यापारी व ग्राहकांच्या दृष्टीने केली जाणाऱ्या कार्याची माहिती घेत व्यापाऱ्यांच्या देखील समस्या सोडविण्याची ग्वाही व्यापारी महासंघाच्या पदाधिकाऱ्यांसमवेत झालेल्या बैठकी प्रसंगी दिली.

विशेषतः मोबाईल बँकिंग, पेपरलेस व व्हाऊचरलेस बँकिंग, ऑडिट कंट्रोल रूम, सोनेतारण कर्ज, रिकव्हरी पॅटर्न आदींबाबत संस्थेचे चेअरमन ओमप्रकाश दादाप्पा तथा काका कोयटे यांनी सविस्तर माहिती दिली. जनरल मॅनेजर सचिन भट्टड यांनी सेल्फ बँकिंग प्रणाली व इतर डिजिटल सुविधांविषयी माहिती समजावून सांगितली. समता महिला बचत गटा अंतर्गत सुरू असलेल्या सहकार उद्योग मंदिरात समाज उपयोगी उत्पादित वस्तूंविषयी विजय गोयल यांनी माहिती दिली.

समता पतसंस्थेच्या वतीने पीआय रामकृष्ण कुंभार यांचा सत्कार संस्थेच्या वतीने चेअरमन ओमप्रकाश दादाप्पा तथा काका कोयटे यांच्या हस्ते करण्यात आला. आपल्या मनोगतात त्यांनी संस्थेच्या कार्य शैलीचे कौतुक करत नागरी सुरक्षेसाठी आवश्यक त्या सर्व सहकार्याची ग्वाही दिली.

या भेटीमुळे संस्थेच्या सदस्यांमध्ये आणि कर्मचाऱ्यांमध्ये उत्साहाचे वातावरण निर्माण झाले असून, भविष्यात पोलीस विभागासोबत सकारात्मक भागीदारीतून समाजोपयोगी कार्ये उभारण्याचा विश्वास व्यक्त करण्यात आला.