समता परिवाराने पालकत्व स्वीकारलेल्या मुलीने केले कौतुकास्पद यश संपादन – काका कोयटे

समता परिवाराने पालकत्व स्वीकारलेल्या मुलीने केले कौतुकास्पद यश संपादन – काका कोयटे

कोपरगाव : मुलींनी आज प्रत्येक क्षेत्रात वर्चस्व प्रस्थापित केले आहे. शिक्षण क्षेत्रात ही नेहमी मुलींनीच बाजी मारलेली आहे. ज्या मुलींमध्ये शिक्षणाची आवड,जिद्द,चिकाटी असेल तर अत्यंत गरीब कुटुंबातील मुली ही स्वतःचे उज्वल भविष्य घडवत असतात आणि आई वडिलांच्या स्वप्नांबरोबर स्वतःची ही स्वप्ने पूर्ण करत असतात फक्त अशा गरजू, होतकरू मुलींना व तिच्या परिवाराला सहकार्याची गरज असते.कोपरगाव तालुक्यातील मुर्शतपुर गावात राहणारे अल्पसंख्यांक समाजातील श्री गोटू सरदार पटेल हे सायकल वर फिरुन कपडे विकण्याचा व्यवसाय करत होते. त्यांच्या मुलीची शिकण्याची जिद्द व चिकाटीमुळे कु.पायल पटेल हिचे समताने पालकत्व स्वीकारले होते.आज त्या मुलीची कोपरगाव येथील संजीवनी अभियांत्रिकी महाविद्यालयात आय.टी.क्षेत्रातील बी.ई.पदवीचे शिक्षण घेत बंगळूर येथील क्रिप्ट इंडिया प्रा.ली. या आंतरराष्ट्रीय कंपनीत ८ लाख रुपये वार्षिक पॅकेज देत निवड करण्यात आली आहे.ही तिच्या परिवारासोबतच समता परिवारासाठी देखील गौरवाची बाब आहे.असे मत समता परिवाराचे संस्थापक ओमप्रकाश दादाप्पा तथा काका कोयटे यांनी व्यक्त केले.

समता परिवाराने पालकत्व स्वीकारलेल्या मुर्शतपूर येथील कु.पायल पटेल हिने मिळविलेल्या यशाबद्दल तिचा आणि तिचे वडील श्री गोटु सरदार पटेल यांचा सत्कार समता परिवाराचे संस्थापक काका कोयटे यांच्या हस्ते करण्यात आला. त्या प्रसंगी ते बोलत होते.

सत्काराला उत्तर देताना कु.पायल पटेल म्हणाली की,समता परिवार हा पतसंस्थेच्या माध्यमातून सभासद,ग्राहकांची सेवा करतच असतो.सामाजिक कार्यात देखील अग्रभागी राहून सहकार्य करणारा परिवार आहे. समताने माझे पालकत्व स्वीकारून इ.११ वी पासून ते बी.ई.पर्यंत आर्थिक मदत केली त्यामुळे समता परिवाराच्या मी ऋणातच राहणार असून काका माझे आयडॉल आहे.समताने माझे उज्वल भविष्य घडविण्यासाठी मार्गदर्शन व सहकार्य केले आहे.मला मिळालेले यशाचे सारे श्रेय समतालाच जाते.

प्रसंगी कु.पायल पटेल हिने मिळविलेल्या यशाबद्दल समता चॅरिटेबल ट्रस्ट,समता नागरी सहकारी पतसंस्थेचे पदाधिकारी, अधिकारी कर्मचारी यांनी अभिनंदन करत पुढील वाटचालीसाठी शुभेच्छा दिल्या.